Nazywom się Klaudia Kołodziej , mom dziejsiynć lołt i chodza do cwortej klasy. To moi prapraołpowie. Łopisa historia powstania łoltołrza w giblu na chałpie łod moich prapraołpow. Chałpa ta powstała w 1882 roku, wybudowała ją rodzina Ressel. W tej familii było siedym dziejci. Nołstarsy to boł Walek, potyn Marija, Zofii, Paul, Jadwiga, Józef i Anton. Mieli łoni szejściejsiont morgow pola. Kiedy dziejci porosły zacli się zynić jedyn po drugym. Nołstarsy synek dostoł się na gospodarka do kobiyty, cora posła miynskać do chłopa, Zofii się nie wydała, bo była chorowitoł, ale dozyła ponad dziewiyndziejsiont jedyn lołt. Paul się łozynioł z Jadwigą Sojka z Jełowej i łostoł na łojcowiźnie. Józef boł rechtor , łozynioł się i ucoł w skole, Anton tez boł rechtor, ale łostoł lejdich. Łojcowie jak już się łozynioł Paul, pośli miynskać na wycug , a modzi sami zacli gospodarzić na swojy.

Dobrze jy się zyło, bo miejli juz chałpa, trocha masin , pole, jedno co jescy jy brachowało, to nie miejli dziejci. Ta jego kobiyta urodziła piyrse i jej umarło, potyn była jescy jedynołście razy szwanger, ale nigdy nie umiała utrzimać. Cały cas prawdopodobnie jejździyła na łodpusty do Piekor i prosiyła tam Matka Boska zeby ją wysłuchała az w końcu wyprosiyła, bo była trzinołsty rołz szwanger i udało jej się, urodziyła synka. Dali mu na imiy Jołzel. Nie umiycie się tego wyłobrazić jak łoni się radowali, bez to na ta intyncjoł wstawiyli do gibla Matka Boska. Łod tego casu zawse do niej rzykali, ło zdrowiy i zeby jy się powodziyło. Synek boł zdrowy i dobrze jy rosnoł , a Matka Boska miała ich w swojej opiece. Bardzo byli łoni jej wdziyncni, ale niestety jak synek mioł niecałe szejś lołt to jego łojciec dostoł szlakanfal i umar i łostała sama kobiyta z ty mały synky na gospodarce, a na wycugu starzi ołpowie. Nastoł dla nich ciynski cas, ale co było robić, z cegoś musiała zyć, to się najmowała paropkow i jakoś jej się gospodarzyło. Potyn synek sed do komunii i tak przelejciało ze już mioł prawie śtyrnołście lołt. Pomału zacon tez matce pomołgać i ynoi rzykali do tej Matki Boskiej co by jy jakoś pomołgała. Ale dla tej kobiyty nastoł nołgorsy cas, jaki mogła dozyć. Było lato i poset się tyn synek do Łodry kompać i już nigdy jej nie wrócioł, bo się utopioł. Tego to się nie umiycie wyobrazić co ta kobiyta przesła, myślała zeby nołlepiej tez umrzyć i boł by z nią spokój  ale Pon Bóg tego jescy nie chcioł i cas goi rany, ale tego się nie dało zagoić. Bo to było coś okropnego. Jej załoba trwała bardzo długo, ale jakoś to musiała przezyć. Po pogrzebie całoł familia się uradziyła i na ta gospodarka przisła łod jej brata cora, cyli moja ołma. Wydała się i łod 1952 roku  miynskała ze swojy chłopy na gospodarce. Chałpa ta stoi do dziś, a w giblu je Matka Boska, yno w niej zołdyn nie miynskoł  bo nastympi gospodołrze wybudowali sobie nowoł, a tanta słuzy jako pomiyszczyniy gospodarcze, cyli sopa.

Klaudia Kołodziej